大摩買起E Trade，為乜？
1. 呢個就真係是日震憾，是日估你唔到，是日黑人問號啦！
2. 大摩，就係成日吹奏摩笛嗰間大摩，香港師奶都識（都話香港街市買送阿嬸都識講Vol）。Etrade 就當然係嗰間Etrade，「Etrade丫拿」（http://bit.ly/38NMSGk）（＊）。網上，廉價經紀。
3. 今次呢個故事嘅前篇，當然係「零佣攬炒大時代」（＊＊）， Etrade對手Charles Schwab忽然間宣佈減佣，減到零！無限期。背後盤算好簡單，鬥燒錢，點都係對手死先。嗰時見到，幾間嘅股價都死晒，但率先飛出嚟減嘅Charles Schwab，跌得最少（http://bit.ly/37FV61X），Etrade同Ameritrade就跌一成幾至兩成幾。
4. 下半場，都寫過（http://bit.ly/3bU1CFK）。十分快手，Ameritrade就已經抬離場，賣盤收場。賣畀邊個？正係賣畀最初發動割喉浴血戰嘅Charles Schwab。Charles Schwab仲要係印公仔紙買起你，一個仙都唔使畀！（當然呢個講法唔完全啱，印公仔紙都有成本，唔只係講稅之類，有樣嘢叫cost of equity，有攤薄效應，亦有機會對家唔受，否則仲有人畀現水？）
5. 好啦，當時已經講，Etrade大輸家，香硬，點都係賣盤收場。又結果唔使三個月就成真。蘇花成件事去到呢度都好正常，埃汾仲可以扮晒嘢話「盡在本人預計中」
6. 但，買家係摩根士丹利，就R晒頭啦！完全唔明喎！仲要全現水。有云真正一線投行，只得兩間，正係政商勾結嘅八爪魚機器高盛，同埋殺人不貶眼嘅大摩。唔係指市值，唔只係計規模，而係，你懂的。做投行嘅，全部都以任呢兩間公司為榮。等於埃汾都話，我呢啲質地，最盡就去到德意志瑞信之類見工（見咋下，唔係請），去到高盛大摩呢啲，真係波皮都未掂到。
7. 咁當然，可以話，大摩點會死錯人（＊＊＊），條數點計，佢清楚過你。但明顯市場都唔多賣帳。對Etrade梗係好消息，股價盤前升好合理。但你見大摩股價即插6%，市場都同我一樣黑人問號，要大摩或其他分析員解下畫
8. 我初步睇，其實大摩睇中嘅，係Etrade嘅deposit base，存款機礎，cheap funding．又睇下係咪咁？要知道好多投行其實冇所謂嘅銀行牌（花旗摩根之類就有），拎唔到零售存款，亦冇私人銀行，好多時資金靠同業拆借（就係之前兩篇講RBS（http://bit.ly/2HCujsX）同錫耶納銀行（http://bit.ly/2vSN0Wp）之類的東西）
9. 當然做零售銀行好煩，又要搞分行，請人又多，監管多，又要對住啲冇錢嘅西客。但勝在匯川成河（諗起N年前嘅恒生定邊間廣告），同埋零售客啲芬定冇咁波動，靠同業呢，又係嗰句，冇事咪冇事，有事就可以好大件事。08嗰時有deposit base嘅銀行，你見好似冇乜邊間會出事。
10. 而又，既然個世界係財富越嚟越集中，咁應該越嚟越不利做零售銀行的。因為你百川千川夾埋都未夠一個有錢客。
11. 但就睇下條數點計了
（＊）Etrade呢系列廣告唔經唔覺差不多廿年，但睇返依然好正，換著而家就大撚把人去投訴了。可以去youtube 睇返，老人院篇大吉利是影埋墳墓，一千蚊紙篇擺明物化女性可撚恥。美好嘅年代。
（＊＊）題目向吾友高天佑致敬（http://bit.ly/2sgHWcR），今日呢單我都第一時間通知佢
（＊＊＊）但其實唔係，雖然呢個係埃汾常用嘅思考方式，但如果真係咁，就唔會有金融海嘯，就唔會有LTCM爆煲啦，廢柴出事日日有，冇乜影響。天才一齊出事先大件事
Search